Mikaelo Bronshtejn malkovris Amerikon!

Kara Mikaelo, mondvojahganto!  Vi vizitis sennombran kvanton de landoj, esperantumante, koncertante kaj ghuante la vivon.

Mi volas memorigi al vi kaj mallonge konigi al aliaj, kiel vi malkovris Amerikon. Tio okazis en aprilo 2006. Vi venis en Novjorkon, kie vin akceptis esperantistoj, kaj de tie vi flugis al Cleveland, che la suda bordo de lago Erie.

Mi renkontis vin en la flughaveno. Vi venis kun gitaro, prunteprenita en Novjorko. Ni ekveturis per surtera metroo. Kaj poste mi veturigis vin per auto al nia hejmo. 

Baldau alvenis al nia hejmo du autoj kun esperantistoj el Columbus, chefurbo de nia subshtato Ohio. Mia edzino Esther preparis bongustan tagmanghon, do nia renkontigho pasis chefe chirkau manghotablo. Poste vi kantis. La gastoj ghuis vian koncerteton kaj plezure achetis viajn librojn.

Sekvatage ni vizitis koncerton de koruso, en kiu kantis Esther. La koncerto okazis en tiel nomata “infanghardeno” por aghuloj, kiun vizitas enmigrintoj el la eksa Sovet-Unio. Vi havis eblon komunikighi kun ili.

Poste vi koncertis en nia domaro, kie loghas aghuloj. Vi kantis ruslingve kaj Esperante. Chiuj estis ege kontentaj. La estraro de la domaro ech donis al vi negrandan honorarion en malmola valuto.

En la tria tago mi veturigis vin per auto en la urbocentron, ekskursante al multaj interesaj lokoj. La plej memorinda estis vizito al la unika kaj mondfama Muzeo de rokmuziko, en kiu mi fotis vin.

De tie ni veturis por prifesti naskightagon de nia bofilo Ilja kaj lia fratino Alla. Kunvenis tre granda kompanio de parencoj kaj amikoj che la tabloj kun bongustegaj manghajhoj kaj drinkajhoj. Ankau tie vi iom kantis.

Matene ni ellitighis tre frue, kaj mi veturigis vin al la interurba autobusa stacio. Baldau vi enautobusighis kaj veturis al Chicago, kie vin akceptis esperantistoj. Kaj poste denove en Novjorkon, daurigante konatighon kun Ameriko en varma kompanio de esperantistoj. 

Kara Mikaelo! En la tago de via 70-jara jubileo mi deziras al vi longan vivon en bona sano, pliajn vojaghojn kaj vivoghuon.

Boris Kolker, kiu konas vin ekde SEJT-9 en la jaro 1967.

            Cerbe kaj kore, Moskvo, julio 2019